行公義是天主教其中一條教義。現時，特首和一些高官誠信破產，大眾對天主教香港教區有一定期望，希望教區會為守護公義而有所行動。往日，前任主教陳日君樞機經常會為不公義發聲，更鼓勵信徒用行動反抗不公義；現任主教湯漢樞機即被形容為相對內斂。港台節目《星期五主場》於12月28日邀請天主教香港教區副主教楊鳴章神父，討論有關倡導公義之事。

楊鳴章副主教於2009年為當時政府推出的校園驗毒計劃連環發炮，他承認有人形容他與陳日君樞機很相似。到了今天，楊神父被問及對特首、高官的誠信、廉潔操守問題時，會有何見解呢？以下為訪問對話節錄（以斜體表示）︰


（《星期五主場》節目截圖）

主持人（主）﹕近期特首以至一尐高官，牽涉好多誠信嘅問題，或者佢地嘅處事手法、品德都惹來一尐批評，你點睇呢？

楊鳴章神父（楊）﹕我認為一個人嘅誠信係非常重要，否則就無法子工作、無法子服眾。咁所以政府高官呢要求大家要奉公守法，佢作為一個高官，應該更加自己律己以嚴一尐啦。咁所以涉及到政府高官嘅誠信問題，我自己認為出面大家都已經講左好多啦，實際上係點呢？真喺我唔知，咁因此 Eric 你問我呢個問題呢，我唔識講。我唔識講呢喺因為我對入面真正的情況喺點呢，我唔喺咁清楚。

主﹕其實公眾睇到嘅嘢，相信同楊神父睇到嘅嘢一樣，就依家睇到嘅，你有無覺得唔合理，或者有無需要發聲嘅地方呢？

楊﹕我希望能夠好清楚咁向廣大市民交代清楚啦，咁如果喺有錯嘅，應該要改變啦。咁呢個就係我要求。因為即係聖經上面呢，連耶穌都同罪人大家一齊來往，耶穌去果尐有錢嘅人屋企食飯，耶穌同個尐犯罪嘅人、甚至同一個犯左姦淫被人捉到嘅婦女喺到交談，耶穌都無判佢咩嘢，耶穌都只係叫佢﹕「你返去啦，以後唔好再犯啦。」

主﹕你係咪暗示緊都可能有尐罪人呀？

楊﹕我……我坐係你面前嘅都喺一個罪人，我地個個都有尐地方做得唔好嘅。

主﹕個個都有尐地方做得唔好嘅。不過教區就對高官就有要求嘅，例如9月嗰陣，對政府嘅一個意見書呢，就話希望新上任嘅特區官員會盡忠職守、關顧市民，以正直、廉潔嘅操守，同依循問責制度履行公職。

楊﹕無錯。

主﹕覺得仲做唔做到呢個期望呢依家？

楊﹕我諗依個係一個目標啦，希望大家都會朝住呢個目標去做，係咪要一蹴即就，隔一晚overnight咁佢就可以做到呢，我諗都唔喺一個好可能嘅事。

主﹕咁即係，依家都未做到正直、廉潔嘅操守呀？

楊﹕依家喺咪？即係仍然正直呢、廉潔呢？……咁我都喺唔敢講。不過，我希望每個人，尤其是政府高官應該更加律己更嚴，咁先可以服眾。

主﹕頭先，你都提過耶穌都同罪人一齊啦。你會唔會為梁振英先生祈禱呢？雖然佢唔喺教徒。

楊﹕我耐唔中呢，即我唔係話耐唔中嘅……晚上呢，我都會為政府官員祈禱治理好香港，咁梁振英先生都係政府官員，都包括在內。不過我無話特別幫某一個人特別祈禱，除非佢有困難，特別請我為佢祈禱，咁我都會幫佢祈禱嘅。

2010年，天主教區神父羅國輝把李嘉誠比喻為魔鬼，楊鳴章副主教公開向李嘉誠道歉，並在報章上說李嘉誠只是搵錢，無罪可言。及後，他被人批評害怕開罪權貴。而在節目中，他解釋「若果講到地產商唔好呢，我從來無話過地產商好呀。香港地產做成咁嘅局面，香港嘅地產商係責無旁貸」，但他認為無必要針對某一個地產商。

與此事相比，現在楊神父為政府官員祈禱，包括梁振英，實在無須驚訝。

主﹕下禮拜二就係元旦喇，有團體就搞大遊行啦，就要特首下台，或者立即普選咁樣。如果有教友來問你﹕「我參唔參加好呢？ 應唔應該去遊行好呢？」即係你會俾咩意見佢呢？

楊﹕我諗呢，就遊行唔遊行，係一個人絕對自己可以自決嘅，佢個權利唻。如果教友問我，起碼唔會反對佢去。至於願唔願意去、或應唔應該去，佢自己應該自決嘅。每個人做事嘅方法都唔同。譬如好似頭先你講到陳日君樞機呀，同湯漢樞機呀，大家嘅處事方法就已經唔同啦。但係我自己就覺得，如果你講到湯樞機，佢唔喺話唔喺為正義而奔走呀，佢好多時都同各方面有關人士接觸，希望從唔同嘅角度去改變一尐唔理想嘅情形。即喺正如果嗰度門俾人刪左，我地都希望能夠仍然有一扇門窗，可以有尐清新空氣可以唞下。

主﹕頭先提到湯樞機都為正義咁去奔走，其實今年教區2月曾登廣告去支持落實普選，咁另外，聖誕文告又再次重申呢樣野。其實呢樣係咪覺得已經喺最盡嘅行動呢？

楊﹕最盡呀？……無野叫最嘅，都仍然有尐野可以再做嘅，我諗按照唔同環境啦。有時有尐事件，係環境帶住走嘅。咁呀……呀……普選即係一件每一個市民應該有嘅權利。咁所以，我地無理由唔爭取嘅。雖然係代價高昂，不過都係我哋要付出嘅代價，同埋應該要極力爭取嘅。至於係咪淨係寫下聖誕文告就得呢？ 咁我覺得唔係𠺢。即係我地都按照可能嘅情況下，再出聲、再做野𠺢。

楊鳴章副主教並無反對教友去遊行，但也無直接呼籲參與遊行。這種說話句式，似曾相識。

這更令人懷念上任主教陳日君樞機為公義而敢言之作風。他在2003年7月1日的祈禱會中說﹕「爭取人權時，我們都要效法良善的耶穌。在我們剛才聽到的那篇讀經中，依撒意亞先知說：『上主的僕人不呼喊，不喧嚷……破傷的蘆葦，他不折斷；將熄的燈芯，他不吹滅。』（依42：2,3）可是，我們將要參與的，是一個示威遊行；這跟這裡所描寫的這樣一個溫良受苦的僕人，究竟有沒有矛盾？當然沒有！因為我們是被迫示威的 --- 我們的意見被忽略，我們的憂慮被藐視。為了對得住自己的良心，對得住下一代，我們不能不用腳步來表示立場。」

時至今日，我們的意見仍然被忽略，我們的憂慮仍然被藐視，而且每況愈下。盼望楊神父真的會如他所講「再出聲、再做野𠺢」。

最後，楊神父解釋何謂公義。他說︰「公義，就不能脫離愛嘅。若公義脫離咗愛呢，公義就變成左好似冷冰冰的石頭、鋼鐵咁樣，無生命力。所以咁因此我哋談論公義時呢，我地千祈唔能夠忘記愛。愛呢，包括包容、寬恕呀，咁所以我贊同我地要爭取，不過同時我哋都要有包容嘅胸襟去聆聽。」

梁振英僭建而且公然說謊，這是非關「愛與包容」之事；這是有關法律之事。大眾只是要求他可以受法律制裁或引咎下台，他無須要為他的惡行而被燒死，這豈無包容呢？這不是正正行出楊神父所講的「既公義又愛」麼？相信陳日君樞機當年呼籲信徒上街抗爭，也出於同樣的公義和愛。

或許，楊神父已經為倡議公義與平衡教區之影響，做到恰如其分。只是，我們非常懷念當年有位主教，敢為公義、良知，大聲疾呼。


相關連結：
《星期五主場》第2集節目重溫