由功能組別轉戰地區直選而成功連任的立法會議員謝偉俊，向來與中辦聯關係密切，被傳媒和網民譏為「西環契仔」。謝偉俊於12月30日接受無綫新聞節目《講清講楚》訪問時，先指出中聯辦官員只應出現在牽涉到中央與香港政府關係的場合，以保持一國兩制之實，暗批中聯辦露面太多；但隨即又發揮其一貫神經刀本色，親口承認中聯辦在選舉期間有為自己拉票。

以下為謝偉俊在節目中與主持人的對談節錄（以斜體顯示）：

主持人（主）﹕我地睇到就喺中聯辦都開始有一個大嘅換班，你點樣睇嚟緊對於特區政府中環嘅管治？會唔會其實喺更加，因為你本身就喺弱勢，你會唔會更加依賴中聯辦，你會唔會有呢個擔心？

謝偉俊（謝）：我都有呢種擔心，因為其實零三年我開始見到好多嘅分水嶺出現就喺當香港政府喺弱勢，而當香港市民相對上比較多反對聲音嘅時候，特別多一尐不論真又好假又好，一尐擔心係外國勢力會唔會介入香港，影響咗香港嘅內政呢？咁呢一方面呢，不論真又好假又好又或者敏感嘅感覺都好呢，令到中央政府需要多尐介入，令到中央政府修改我哋嘅基本法嘅權力，咁呢香港喺其實十分之不利嘅。咁所以我地覺得作為香港嘅領導人嚟講，需要係更加小心、敏感地處理呢個問題。一方面要讓香港社會更加少尐嘅吵鬧，另外多尐嘅包容、多尐協調、多尐協商。另外一個方面亦都要好好同中央政府合作解釋清楚，甚至乎有時我覺得中聯辦其實係唔適宜太多出現喺公眾面前，包括有時，雖然喺好小意思，但喺我自己落地區呢排多咗呢，感覺上好多時呢尐地區組織嘅活動都好鍾意邀請一尐中聯辦嘅官員出席。咁當然啦，多尐官員有時交流一下冇乜所謂，但喺感覺上呢其實唔喺咁恰當。因為中聯辦嘅參與應該喺一尐真正牽涉到中央政府同香港政府，例如話國慶嘅升旗禮就冇所謂。但你平時一個黃大仙區某條邨嘅活動都搵個中聯辦嘅官員坐喺度主禮，而且佢主禮嘅位置仲要喺香港官員之上，呢種感覺整吓整吓好似就真係好似香港似足內地果一套，就喺話有一個政府，有一個書記咁，咁呢種做法我相信香港人喺暫時都覺得唔喺太舒服。

主：其實過往一段日子裡面尐人話你喺西環契仔，起碼就喺你自己有冇入過中聯辦？

謝：選舉時候嘅標籤唔等如乜嘢，咁事實上中聯辦梗喺入過啦……但係我必須強調我始終都喺香港仔。我喺香港出世嘅香港仔。咁始終我最緊張嘅係香港本身嘅情況。至於你話同中聯辦嘅關係、同西環嘅關係、同中央政府嘅關係，我覺得喺今時今日嘅大局香港社會一國兩制之下，一定唔能夠同中央對著幹。一定要有傾有講，一定要互相尊重、互相體諒先喺可以落實香港一國兩制。否則嘅話如果喺無咗呢個互相，一國兩制喺唔可能繼續行落去。咁對香港完全冇利，只有害無益嘅。

主：過往你都入過中聯辦唔止一次啦咁樣……咁即喺話其實外界話你喺西環契仔呢一個咁樣嘅講法，其實都唔喺完全無理據？

謝：你話如果我哋有無關係、有無有傾有講，一定喺有嘅。甚至有無幫我呢，一定喺有嘅。比如話好多係介紹我識一尐重要嘅人同社團，一定係有嘅。咁但喺問題係咁嘅幫助、咁嘅賞識或者喺互相明白諒解合作，喺建基於一個我喺完全一個獨立嘅身份……如果你係要我surrender投降好似投票機器咁呢，我唔能夠接受。……

主：中聯辦咁其實喺過往選舉裡面有無為你拉過票？

謝：我相信一定有，有嘅意思就喺話佢哋有佢哋嘅網絡啦，或者社團嘅關係呢，一定會幫手……但喺你話會唔會話我喺某尐政黨某尐所謂呢個一定要力保嘅，又或者呢個唔可以輸嘅，又或者揼好多錢落去支持咁就完全唔喺呢回事。總之我情況就喺話，我可以接受左中右人士嘅支持，但我唔能夠接受任何人壟斷咗我，或者支配咗我嘅投票同行事取向。

主：咁而家我哋成日都講，中聯辦變天喎，睇到主任副主任分別就去咗廣西同澳門咁樣，喺咁樣嘅情況之下，其實你覺得契爺喺咪換咗呢？要再去結交過呢同阿張曉明。

謝：其實呢契爺就好多個嘅，甚至中央呢都唔知邊個先喺契爺，集體契爺都唔定。咁你話其實要掌握邊一個喺契爺呢，其實冇可能嘅。反正就喺我地一定唔能夠同中央對著幹，一定喺唔能夠侵害呢個一國兩制嘅大原則，更加唔能夠接受尐外國勢力嘅支配。……

事實上，根據基本法第廿二條：「中央人民政府所屬各部門、各省、自治區、直轄市均不得干預香港特別行政區根據本法自行管理的事務。」謝偉俊在節目中的言論，無疑「指證」了中聯辦違反基本法、破壞一國兩制。

中聯辦插手香港事務，幾乎是人所共知，但由在其扶持下當選的謝偉俊口中得到證實，格外叫人哭笑不得。