「本班列車將稍為延遲...」日日聽著港鐵延誤的廣播，都習以為常，幸好每日都再預早七點出門口，否則遲到又被扣勤工了，雖然，得雞碎咁多。

未夠三十歲，但都覺得仲要依賴交通工具好悽慘，特別是我呢啲有腳痛傷患，但表面看出不來的後生仔，坐，呀唔係，唔敢坐，只敢企港鐵，免得唔為意有老人家大肚婆在附近讓唔切座，就隨時被拍上網公審。

終於逼到金鐘轉車，人多空氣侷，夏天特別難忍，開個芭蕉扇涼吓啦，點知隔嚟個呀叔，就讀屈穎妍篇《芭蕉熱》，話「青春，本應是『捱得』的代名詞，今天，卻早跟嬌生慣養畫上等號。放下你的芭蕉扇吧，流一點汗、多吃點苦，來到冷氣間，你才會懂得感恩、懂得珍惜。」

都唔知得罪佢啲咩，到出閘個個到趕，佢係都要批雞翼掙攝喺我前面，我敬老讓佢喇。返到去，班呀姐係咁講同個仔去邊旅行，拋低啲野比我跟就算，佢地吹水吹到唔洗做咁。要佢入系統喇，又話密碼唔得，即刻打去IT度亂咁鬧人，原來自己Hi咗個Cap Lock呀。面懵懵之後去開會，發洩曬落嚟，開曬啲廢會，次次都冇用，有佢講冇人講，問題講野冇Power又冇Point，但係都要Recap 又Recap，等到兩點散會餓到我死呀。

平時我就帶飯嘅，諗住慳錢又唔洗應酬嘛，你知香港公司，同或者唔同邊個食都係扮公室政治吖嘛。不過上次Appraisal呀姐話咁樣唔合群，要同同事（包括佢）食喎。咁好啦，去到食，佢地係咁講隔離Team是非，話呀邊個邊個去Working Holiday係冇出息掛住玩、話邊個未來女婿買咗樓先係叻仔，關我事咩？我咪篤手機炒iPhone波鞋，同網購慳吓錢囉，又比佢話低頭族係眼光狹窄。仲話教精我話，要學識炒股炒樓先有出息喎。呢個年代，你要有錢，首先要有錢先得㗎，我啱啱先還完Grant Loan，交完家用份奀到喊嘅人工淨番幾多吖。成日都比佢地啲所謂中高層話後生唔努力、一蟹不如一蟹。

食完飯番去，我就做到冇停手，佢地班中高層就忙囉，係咁講自己細路點讀兩間幼稚園、讀幾多興趣班，慌死人唔知佢地壓迫仔女好似壓榨下屬咁，然後佢地傾到六七點就有十萬個借口放工，臨走前掟份野落嚟話「唔急㗎，聽朝九點交就得。比心機，捱吓啦後生仔。」

我就做到夜晚十一點幾，終於可以收工搭的士Claim番公數，一上車耳筒塞住耳仔，費事聽到所謂主流媒體，請嗰啲咩人力資源顧問話「八九十後工作態度散漫、不懂跟同事相處、成日嗌辛苦想跳槽」。點知個的士司機話唔識路，隔晚都係咁。好啦，教咗佢條路，佢又問我「後生仔有冇佔中呀？有冇收錢搞亂香港呀？」我廢事睬佢。但仲繼續：「都唔知你班後生玩咩手機，咩Uber話？搞到我地行家冇生意呀！阻人搵食咁衰，我聽日去塞住條路睇吓政府幫唔幫我！」我差啲想讀朋友Facebook上的Status：「死廢中唔捱得！淨係識埋怨！一定係收左錢出黎搞事！」落車找錢仲有五毫子我問司機去咗邊，佢仲要聲大大話：「不嬲都冇㗎喇，你班廢青真係第一日出嚟撈㗎？幾毫子仲同我計？」

我唔明，點解搭的士都要受氣？
只知道，後生就有原罪，就日日被人批鬥。

延伸：總之後生仔呼吸都係錯
http://www.passiontimes.hk/article/07-07-2015/24186