尋日，灣仔舉行咗個招聘會，提供嘅五百個職位空缺當中，當中包括政府紀律部隊。有自稱黃絲嘅女生投考警隊，原因就係人工高福利好。

我見到之後覺得好嬲。身為一個黃絲，無可能唔知警察喺呢幾個月嘅所作所為有幾咁過份。唔單止前線部隊濫用權力，後排嘅面對投訴仲官官相護。暗角七警到而家都仲未被起訴，就係一個好例子。

可惜，嗰位女生喺面對高薪誘惑底下，選擇咗報考警隊。為咗錢，佢決定咗埋沒良心，但佢咁做，其實同為咗慳錢就用地溝油嘅奸商有咩分別？我明白唔應該要所有人都做聖人，要求所有人都完全無錯。但點都應該有條底線喺度，物質唔應該大於個人嘅良知，咁做法，同強國人又有咩分別？佢哋就係為咗賺多啲錢而偷工減料，先會有咁多黑心食品大頭奶粉嘅出現。可惜嘅係，香港人將錢睇到太重，從日常嘅生活例子已經可以得知。免費報紙嘅價值係可變賣嘅廢紙，而iPhone就係炒賣嘅工具。從嗰位女士之後講嘅嘢，亦充分表現出佢幾咁物質至上，認為有樓就贏咗。以前黃子華所講嘅係「搵錢啫，犯法呀！」，可悲嘅係，而家已經漸漸變成「搵錢啫，犯法又如何？」

更重要嘅問題喺後面，佢點解會對警察呢份工作有少少抗拒呢？原因竟然係無朋友或者會樣衰。點解唔係因為警察道德問題呢？係唔係如果朋友中無人出聲，你就會覺得警隊嘅所為係無問題呢？又或者相對來講，點解你會選擇自稱為黃絲？係唔係因為咁做會有朋友或者有面子啲呢？定係因為支持民主理念或者想要真普選？

做一樣嘢，唔應該係因為人做我做嘅跟風心態，而係要真正明白背後嘅意念。正如我上一篇文所講，玩 ice bucket challenge 唔應該係因為一種找數心態，而應該因為想關心弱勢社群。講「我們都是學苑/查理」唔應該係因為潮流，而係因為尊重言論自由。呢位小姐喺自稱黃絲嘅時候，又有無諗過係出於咩原因呢？但從佢嘅言論同行為，我相信個答案係無。所以點解有時候會有人話香港人偽善，咪正正因為好多人做係因為「人做我做」個心態而去做，至於背後有咩理念同原因，就全部忽略晒。

名同口號，係好虛無，每個人都可以叫，但如果經過咁多日都唔了解背後嘅含意，咁自稱黃絲又有咩意義？