（呢個係早前應承過，同大家分享返大陸睇樓嘅情況，如果睇完你感到不適，我都唔知點幫到你。）

2014年雨革前，阿姐再次發配我去邊彊，返大陸睇「大公司」嘅豪宅，確實地點你哋估下啦。總之，「大公司」就好似圈地咁，成個地區包晒住宅、商場、家具城、學校、交通配套。「大公司」喺呢個圈，就好似小倩吸陽氣咁，一站式吸乾哂個客嘅日月精華，搾乾搾淨佢嘅財富。

____________________________________

好啦，開始睇樓啦……

由於係豪宅，公司請咗啲靚女帶客睇示範單位，啲靚女成個香港小姐咁。如果香港睇樓都有靚女或者猛男帶你睇就好啦。一入個示範單位度，我就好似睇煙花咁，嘩嘩嘩，好大呀，好高樓底呀，裝修好豪華呀，TBB溏心風暴間大屋咁呀。出面好多樹木呀，樹木嘅範圍大過亞馬遜雨林呀。

開心完一輪，原來一切都係海蜃神樓……

睇完個示範單位，香港小姐話要帶我參觀園林花園，夏天睇樓已經熱到我接近人體爆炸，而家前世未見過樹咩？一路行一路覺得好唔對路，得一排樹嘅，後面個啲全部係爛地嚟嘅，樹呢？明明頭先喺單位望出去好多樹架，售樓書塊地好似飄零燕咁綠油油架，原來，爛地將來都係住宅。

頭先睇過嘅溏心風暴豪華裝修，原來都係for your reference，因為係賣清水樓，清水樓單位冇俾客睇，我就入去睇左一睇，真係broken dream，好似姑姑同過兒住嗰個古墓咁。

好啦，呢個海蜃神樓要幾多錢呢？我印象中以前TBB台慶抽嗰啲碧桂園都係幾十萬。你就想，原來呢個盤要幾百萬，大陸喎，人仔喎，又話返大陸買樓一圓置業夢？我終於都明白無論喺邊，我都買唔到樓架啦。

____________________________________

故事嚟到呢到好似都唔係好特別，去到銷售中心我終於都崩潰啦……

個盤唔平，啲料又好一般，但買樓嘅人都好似細胞分裂咁多，我真係好困惑。我只係想快啲走，現場有大量大陸細路，不停係個地面典，仲叫到發生命案咁，啲大陸細路著嘅係開浪褲，仲有一兩個細路瀨緊屎，銷售中心個雲石地真係慘不忍睹。

香港小姐話要睇下個沙盤先走，拿拿臨啦……

香港小姐就急急腳，行埋個高科技沙盤度，「河岸兩景，地鐵上蓋真係好少有，個盤今年落成，2017年會直接連接高鐵，個半鐘就到香港西九龍高鐵站……」。仆街，我終於明點解咁多人買啦。香港小姐一路介紹，佢突然啪咗粒掣，個高科技模型一路升上來，顯示個樓盤地庫連接住大陸地鐵，再連住個高鐵線。呢個時候，有個仆街大陸佬喺我隔離見到個模型升上來，不停大叫：「升……升……升……升……」，我真係好想喊呀，好想搵把刀劈死個大陸佬呀。個半鐘就到西九龍高鐵站，咪即係直達我住個區，我崩潰啦。

____________________________________

一地兩檢嘅疑問？

我不停諗「個半鐘就到西九龍高鐵站」呢個selling point，點解大陸賣樓嘅時候，完全冇提一地兩檢點執行？事後我諗到有兩個原因；一、特登唔提；二、亦係我一直擔心嘅原因，未來大陸屬意冇一地兩檢，亦即高鐵通車之時，大陸人可自由進出香港境內，香港大陸邊界亦唔再存在。嗚呀，媽咪呀，救命呀。

____________________________________

「辣招」一出，有人問：「你覺得香港樓價會唔會如政府預期，有跌嘅空間？」

一、其實層樓幾多錢，都會有大陸人買架……

如果（我話如果呀下）將來大陸人可以自由進出香港，香港嘅樓就唔係供應畀香港用家，而係供應畀13億嘅同胞，買家數目咁多，樓價點會下跌？

二、2013至2014年度，八間大專院校嘅大陸生有萬幾人，而2015年新單位嘅落成量預計係一萬二千幾個，換言之，新單位畀呢班內地生都只係啱啱好。你一定話，佢哋讀書就住宿舍啦，咁我想問，讀完佢哋留低住喺邊？「唔係個個留低架嘛，你又喺度廢up」，自回歸後呢班大陸生嘅數目，係好似強積金咁一路累積架。仲有，每日都要畀l啲單程證大陸人嚟家庭團聚呢？需求大過供應咁多，香港樓價會跌？

三. 只要不停增加土地供應量，個樓價就會跌架啦……

每次我聽到政府呢個說法，我都諗起洪金寶曾經舉過嘅一個例子。洪金寶話：「只要不停喺市面上供應Benz，Benz個價錢就會跌到窮人買得起？」以後窮人唔坐地鐵？政府唔係增加地鐵嘅載客量，增加Benz數目，真係托咩？