尋晚我由紅地毯嗰刻開始就睇金像獎頒獎禮，我真係由頭睇到尾，汁都撈埋。我形容完全係「呢咁hea」，我只有一個感想：一個唔專業嘅金像獎頒獎禮，點說服外界香港電影係專業？

紅地毯上，嗰個唔稱職，又著得好肉酸嘅娛樂新聞台主持 Natalie，佢問問題，永遠都冇將個咪對住自己個咀，每條問題我只聽到一半。娛樂新聞台嘅黃曉明，不停提醒大家，要留意今晚陳小春會唔會爆肚講佢老婆到底有冇BB？我有聽錯嗎？轉播傳媒你有指導員工，你哋係播緊電影頒獎禮？

有關邀請陳小春做主持，我真係好明白要畀機會唔同人做主持，曾志偉都冇可能長生不老，但可唔可以唔好搵個，好似食咗忽得嘅陳小春來做，完全聽唔到佢講乜，冇字幕架大佬。有關捕捉鏡頭，有冇需要不停畀鏡頭應采兒？意義何在？

有關 my little airport，王菀之仲有明哥畀人 cut 歌，我會問：「除左ATV直播個年，有邊一年係可以聽得完成首歌？」

有關每年一度悼念已故電影人，個合唱團唱嗰首祝福，真係太高音，啲細路駕馭唔到，令人毛管戙，好似聽汪明荃唱歌咁，每秒都擔心佢下一秒走音。

有關向霑叔致敬，可唔可以搵啲唱得比較好聽嘅歌手唱？可唔可以解釋向霑叔致敬嘅用意？同頒獎禮主題「電影狂想曲」，扯唔上任何關連，好「攝時間」。如果呢個環節係為湊夠時間，點解唔畀電影歌曲入圍歌手唱完成首歌？

________________________________

有關頒獎嘉賓，畀啲掌聲任賢齊，佢真係好尊重香港呢個主場，佢講嘅廣東話我聽得明，好過陳小春多多聲。

黃秋生係講得好好，好有趣，但佢作為一個電影人，喺香港電影周年最大盛典頒最佳導演，點解講詞可以同香港電影扯唔上任何關係？

________________________________

有關得獎者……

「劉青雲真係好型呀，佢真係好錫佢老婆呀……」呢句喺FB出現嘅次數應該會追近吳若A嘅「點解嘅」，正如劉青雲自己所講：「啲女性觀眾好鐘意聽呢一 part 架！」真係好想長嘆息，連蘋果新聞都即時將呢 part 做重點新聞報道。

大家有冇聽到，個旁白介紹劉青雲得獎，佢係提名左16次，第2次得獎，聽到嘅時候，我心諗：「唔係下嘛？」金像獎今年第34屆，而劉青雲，提名咗16次？咪有一半嘅年期都有佢份？電影圈冇新人架咩？今屆嘅提名，劉青雲仲可以有兩個提名，另外兩個提名分別係大陸嘅黃渤，同埋台灣嘅彭于晏。劉青雲出色真係無庸置疑，但係，16次嘅提名，係因為劉青雲太出色，定係香港電影圈真係太冇人？

________________________________

呢個所謂嘅電影頒獎禮，不論主辦方、轉播傳媒、表演安排、主持甚至頒獎嘉賓都顯示唔到恰當嘅專業程度。一個冇協助推動香港電影發展嘅周年電影頒獎禮，每年只求提供娛樂新聞畀公眾笑下，搞來做咩？

黃秋生話：「我要真……係做司儀！」作為一個香港電影觀眾，我要嘅係「真正回歸主體，回歸於香港電影嘅電影頒獎禮」。