（以下內容可能引起爭議，歡迎口誅筆伐）
　
相信大家身邊一定有朋友時不時 like 一個新進組合「范范黑人同孖仔」，時不時就會喺 FB 見到呢個組合，最近有網民對呢個組合瘋狂洗 FB 版表示不滿，插孖仔樣衰，頂佢兩公婆唔順，話又一個「阿歷山大老母」。
　
到底佢兩公婆有冇錯？如果錯，最大嘅錯係唔係「孖仔樣衰」？
　
老實講，我覺得佢兩公婆瘋狂洗 FB，PO 孖仔有錯。而我覺得「樣衰」並唔係原罪。
　
Law of diminishing marginal utility ......
我用我非常有限嘅經濟知識諗呢件事，大家 econ 堂都有聽過 Law of diminishing marginal utility。假設你隔離個鄰居係貝多芬，佢彈琴真係彈得好出色，live 真係好聽過 CD，但佢日以繼夜，夜以繼日咁喪彈，真係福音都變噪音。范范黑人 PO 孖仔個頻率真係好高，每日最少3次，而每次都要感恩，我真係相信耶穌都覺得「that’s enough 架啦」。對孖仔個　nick name 係小熊貓，有時我真係覺得佢兩公婆同有線個熊貓直播台冇分別，24 小時放送「小熊貓」。
　
舉多個例子，唔知大家身邊有冇 D 朋友仔，結婚一年前，就好似奧運咁進行倒數，其實我真係祝福你地，問題每日 PO 婚紗照一張，再附上「待嫁心情」caption 真係 over 左，然後你會發現，初初求婚個張相有幾百個朋友仔 like，婚期愈近，得返新娘自己 like。就算孫悟空真係好鐘意食長生不老嘅蟠桃，日日食都飽飽濟濟啦。
　
PO 上網嘅 BB 真係要 above average…...
有人話「孖仔樣衰」就好心唔好日日 PO，我真係外貌評論學會成員，但我真心唔覺得佢地樣衰。大家覺得孖仔 annoying 唔係因為佢地樣衰，而係佢地「唔夠靚」。老老豆豆，上FB 都係想睇靚野，普通野點吸晴？PO上網嘅BB真係要 above average，要好似碧咸個Harper，威廉個公主咁。
　
違反商品說明條例…...
我明白每個人都有呢個諗法，「你個仔係好靚，但我個仔真係最靚」。好多時候，范范黑人都高度評價佢對孖仔，而佢對孖仔比較平庸真係一個不爭嘅事實，佢兩公婆對孖仔嘅評價同事實嘅落差，的確係令人失望架。
----------------------------------------------------------------------
　
「成名要趁早」，問題係會唔會太早？
→ 打從佢地成為一粒胚胎，孖仔就係名人。范范黑人係明星，公眾對孖仔嘅評論亦順理成章包括對佢父母嘅評價。佢兩公婆日日 PO 佢地，其實係提早帶孖仔進入殘酷嘅大人世界，接受萬千網絡賤人嘅 comments。
　
→ 范范黑人 FB 絕對係 public for all 嘅 page，坦白講，平時有 D 朋友仔 BB 其實係姿色平庸，但大家都留有一線地作出讚美，但范范黑人係公眾人物，大家就會「將事實及事實之全部」講哂出來。
　
→ 孖仔畀父母擺上台，佢地想唔想先？謝檸檬話佢從來都唔想出現喺明周封面，話畀人知佢「全家都好幸福」。相信孖仔都未必想日日真人 show。咁樣公開佢地，會唔會令佢地成長帶來不便呢？黎耀祥曾經話唔想帶個仔去片場，唔想令佢有做明星好玩嘅幻想，錯誤引導佢選擇職業。平凡嘅生活相信就係對孖仔最好嘅生活。
　
→ 我睇過黑人 PO 過一個問題，問點減少孖仔成長中面對嘅比較。其實佢兩公婆日日PO，只會令將佢地作出比較嘅 pool，由姨媽姑姐擴大至華南地區以及全世界。
----------------------------------------------------------------------
　
有人話范范黑人好似亞歷山大老母，靠個仔谷人氣，賺錢搵 sponsor，我唔覺，我覺得佢地真心並自我感覺良好地覺得孖仔呢對 product 係完美。但作為父母，著眼點係咪應該在於孖仔點成長係最好，而唔係有幾享受做父母嘅樂趣呢？呢個問題似乎唔只係應用於佢兩公婆度，亦應該係每對父母問自已嘅。
　
最後係，一定有人話：「到你有仔個時，你唔好每秒直擊呀。」到時先算啦，Er ...... 如果有一天，我希望保持清醒同克制啦。

（黑人陳建州 Facebook page 截圖）