今個聖誕，我準備咗份大禮畀香港政府，我用咗兩個星期，分拆支票交稅，參加不合作運動，增加政府嘅行政成本。

我總共寫咗689張$6.89嘅支票，由於我係一個窮得只有時間嘅窮撚，所以我冇訂造印仔，手寫咗689張。朋友仔問點解唔雕印仔，但就算雕，頹極都要去街市買兩個薯仔，咁又係要錢，所以決定手寫。

＿＿＿＿＿＿＿＿＿＿＿＿＿＿＿＿＿

由於我嘅恆心低過689嘅智商，中途真係好想放棄，689張支票比我想像中大鑊好多。689個英文名真係同佢個人一樣咁煩，Six dollars and eighty nine cents only 玩死咗我。仲要阿爸教我簽銀行野要簽中文名先型，我簽銀行簿係用中文全名，阿爸又同我改個咁多筆劃嘅名，真係簽到柏金遜。我亦由當初嘅楷書，寫寫下變咗草書。

一路寫，我一路諗起金枝慾孽個如妃娘娘俾皇后罰佢抄經祈祈福。係個仆街政府咁仆街搞到政局紛亂，局我上梁山，參加不合作運動架。

＿＿＿＿＿＿＿＿＿＿＿＿＿＿＿＿＿

到底有冇用：

阿媽鬧我：「白痴仔，嘥時間。」確實係好嘥時間，但我反問自己，啲時間唔用喺寫支票度，會唔會用喺其他地方，可以表達爭取民主，689落台呢啲訴求？我諗唔到其他，所以我參加分拆支票行動。

阿媽又鬧我：「本身間房都同將軍澳堆填區咁，飽和架啦，仲訂咁多支票簿……」聽到佢咁講，更覺得咁做有用。呢幾百張支票去到稅局，增加唔到職員工作，都佔領左咗個工作空間。我真心希望經手職員如實反映俾上層知，不合作運動帶俾佢哋行政不便，令政府有一絲內部施政壓力。

「玩死啲銀行職員同稅局職員啦你。」香港是我家，瀨野齊參加，除咗 sorry 同唔好意思我唔知可以講咩。怨有頭，債有主，唔好怪我參加不合作運動，要怪就怪搞到市民咁不合作嘅政府啦。

今次我嘅行動，最少令一個人思考政府施政問題，就係我阿媽。呢兩個星期，我一路寫，我一路好似唐三藏念「色即是空」一樣，瘋狂感化同啟蒙阿媽，呢個可算係最大嘅收獲。

＿＿＿＿＿＿＿＿＿＿＿＿＿＿＿＿＿
 

我真係好想多謝小學3A班嘅 Miss Lee，唔係你一星期罰我N次罰抄，我真係冇意志力完成呢個行動。我見到呢疊紙，真係熟口熟面，呢疊野真係好似拜山燒衣嗰疊溪錢，如果可以的話，我真係唔想交去灣仔，可以直接燒俾689你話幾好呢。

P.S. 有關申請N本支票：我係幫襯開痕身銀行，e-banking 只可以 click 一野申請一本，card center 職員話唔可以電話申請多本，你可以喪 click e-banking 個掣，一本有30張，想參加分拆支票交稅嘅朋友仔，自己安排下申請支票簿啦。