李卓人在六四論壇話，支聯會要求先「平反六四」。跟住佢話「平反六四唔係終點，只係起點」，因為之後要「建設民主中國」，中間又要「追究屠城責任」。我登時大驚。原來廿六年都爭取唔到嘅嘢，只係你地組織嘅「起點」，咁幾時先去到「終點」？仲有，乜「追究屠城責任」同「平反六四」又分開玩㗎？樣樣嘢逐件拆開，真係長做長有。「建設民主中國」又難度高過「平反六四」百倍，你支聯會又有乜把炮「爭取」？睇嚟無番一百幾十年，都唔會爭取到你地講呢三樣嘢。到時中共都應該倒咗台，不過我肯定唔係因為你支聯會囉。

支聯會的《六四答問Q&A》，不斷強調「要幫中國爭取民主」。李卓人過去幾年多次講過「如果中國今日無自由民主，香港都唔可以有真嘅普選」。但最近一年，由於這觀點不斷受到質疑，支聯會同李卓人一齊改口，話「我們從不認為必須中國大陸先有民主，香港才應該或能夠實現民主」（見《六四答問》第十三題）。咁實情係點？根據佢地最新嘅講法，香港理論上唔洗等大陸有民主先開始爭取，但話如果大陸唔變，喺現實上中共又係香港民主嘅最大障礙。李卓人在六四論壇又話香港爭取民主，大陸會繼續打壓。

有「障礙」同「打壓」存在係客觀事實，但套返落支聯會個論述入面就錯晒，因為：

1）香港爭取民主先，支聯會話現實上很困難，因為「大陸係障礙」、「中共會打壓」；
2）兩地一齊搞呢？根據《六四答問》「中國和香港難以同步實現民主」；
3）大陸搞先呢？唔得，《六四答問》話唔番大陸搞民主，因為要大陸「他日進行政治改革，有一定程度的開放」，先會有人「回內地協助建設民主。」

呵呵！乜仲有第四個可能咩？梗係有啦！咪就係：香。港。同。大。陸。都。唔。搞。囉！

支聯會係咪好聰明呢？

即係你話可以做晒兩個project，公司個個月出糧俾你都無貨交。你俾嘅理由係：

1）未做完Project B, 做 Project A太多困難。
2）A同B一齊做又無期。
3）做B先呢？B宜家有問題，要等啲問題他日自己解決自己你先可以做。

好嘢，乜都唔洗做！齋出糧，李卓人同支聯會繼續 Eat, Sleep, Recycle!!

「永續社運」真係無得輸！你都係留返嚟呃啲無知婦嬬同「維園阿伯」啦！