無論是核心抑或非核心球迷也好，都認同世界盃是一件盛事，今屆更由影響力龐大的TVB奪得轉播權，關心的人肯定比起對上三屆為多，但盛事不代表有質素，世界盃是否真的值得那麼期待，要捱更抵夜去睇波呢？

還記得小時候足球轉播場數有限，故在世界盃期間一次過欣賞多場比賽，確實是一件賞心樂事。不過時移勢逆，很多專業球迷一星期都已經看了超過十場比賽，根本就沒有餓波問題，自然對世界盃的憧憬大減。

其次就是球賽質素的問題，筆者敢肯定，世界盃這類國家隊級賽事的整體質素，肯定遠低於歐洲頂級聯賽，例如質素不俗的非洲兵，卻經常因為獎金問題，而與足總交惡，結果踢不出球會時的水準。

再講，國家隊由埋班到出戰世界盃，只有不足一個月時間，根本談不上默契，加上經過一整個球季的拚搏之後，體能已經用得七七八八，所以上屆兩大星級球員美斯（Lionel Messi）及C朗（Cristano Ronaldo）都踢不出水準。再加上雙方不熟路的關係，故牌面較弱的一方，往往都排出鐵桶陣死守，怕輸令到整場波的可觀程度大減。至於強隊，可能因為提早出線，往往會在第三輪分組賽「揸流灘」，造成比賽出戰大量垃圾時間，捱眼訓去睇簡直是受罪。

以往不同洲份的國家隊，都有著不同的特色，例如非洲兵以快速見稱，南美就當然買弄腳法，東亞就以體力制敵。但到近年，差不多隊隊都變成了德國隊，講軍紀，講效率，陣式差不多隊隊都是排出單箭頭，完全欠缺個人特色。

講真，識睇波，一定係睇歐聯，過往筆者因為工作關係，要硬啃對上三屆192場世界盃比賽。因為賽事質素太參差，完全感受不到睇波的樂趣，直至歐聯重開，才可以真正看到有質素的頂級比賽。今屆筆者工作崗位轉變，毋須強制睇波，可以揀波睇，或許對世界盃有另一種體會。

（TVB世界盃主題曲MV截圖）