年尾流流，打工仔嘅我哋最關心嘅梗係份年終花紅同埋出年加幾多啦。

未掀盅前，我都自己打定底，做定功課架喇。留意返啲報道話，今年各行業平均加薪5.9%，另外花紅派1.5個月，四叔仲話輕輕派返十個月獎勵傑出員工。

精神嘅。

我諗定架啦，家陣咬緊$13,750。6%加幅，應該都有8舊水到。花紅就個半月……加加埋埋，應該呢round多兩皮野落袋。

首先我會畀多少少阿媽過年，而家出咗去租樓住，好少返屋企飲阿媽靚湯。上一次，飲飲下湯，阿媽問我夠唔夠錢使，我望住阿媽，個心up住up住。差唔多三十歲人仲要阿媽擔心，我覺得好失敗囉。

望住阿媽臉上面多咗好多皺紋，唉，媽，辛苦喇。我決定去買啲韓國寵寵寵護膚美顏化妝保品俾佢，女人貪靚，係正常嘅，你睇我幾細心，媽一定會好開心我咁生性。唔，嗰度應該$3000左右可以KO件事。

輪到BB豬。識到BB豬真係我最大福氣，佢唔好名牌，唔會立亂洗錢買袋買鞋買pandora粒粒膠。我會拎晒一個月糧出來，放入我同佢嘅聯名戶口到，掂！距離上車又近一步。

還住少少卡數，剩返畀自己應該有$3000到，爽。下個月每日多一舊水用，YES，可以日日加凍飲同炒底。

登登登登。等到喇，我以全年最smart的心情拆開個信封。

5，4，3，2，1……

屌你689，加得我1.3%？計埋兩舊水都無！？

等陣！Hold住孖八，唔好躁住，玩野咋嘛？搞氣氛咋嘛？你知啦，我地做廣告嘅就最百厭架喇，無事嘅，或者整返三、五、七個月花紅嚟呢。

「唔……公司呢，今年啲生意就麻麻地喇……」

喂！你咪呀你！

「你哋知啦，而家傳統廣告好難做，人人開著個FB拎住部機，又話出嚟撈喇……呢到啲租又係咁加，啲客又愈黎愈反智……嗱，尋日之嘛，我先同個業主吵完……」

我唔想知呀我唔想知呀！

「今年bonus呢……就無架喇，不過，公司會請大家去打個邊爐，任食。YAHOOOO！」

屌我老母啲化妝品呀！份首期呀！我杯凍檸賓呀！嗚呀！

「老細，我覺得咁樣唔係好啱規矩喎！」隔離team有人起哄。

「嗱嗱嗱，bonus嘅野其實係bonus嚟架，公司唔一定要出畀你哋架。你哋做創作嘅，搵到自己鐘意做嘅野，又可以成為職業係好幸福，好過好多人架喇。馬雲都講過，一定要興趣先決。嗱，畀啲心機，嚟緊新一年大家做好啲，齊心啲，做啲成績出嚟！香港地，周街都係大陸有錢阿姑，必你地啲創意出黎，水柒佢哋啲錢啦。」

「呃……」

「其實你哋應該學下亞視員工嗰份堅毅。無論出面幾亂，無論暫時性未見有人工，依然緊守自己個專業崗位，同舟共濟。信公司，撐公司，貼錢搞埋場show你睇都仲得呀！創作人，唔講錢架嘛，好應該要係咁。」

「呃……」

「係咁多喇，打邊爐見！」

「呀，順帶一提，公司習慣二月做年度結算嘅，大家新嘅人工將會係三月先見數，大家努力，打邊爐見啦！」

呀呀呀呀呀呀呀呀……

媽……BB豬……

拎住張糧單，我真係開不了口，打出嚟，你哋自己睇啦。

奉勸各位，當大家正躊躇緊份bonus點用，默去旅行、去邊到開酒食翅食好野、買乜買物嘅時候，身邊如果有啲朋友聲都唔出多句，西口西面嘅……

真係，唔好搞佢地。

有啲人，連annual邊爐都要自費倒貼……

俾佢講中咗，其實我……都好亞視。

TAG定啲未出「B仔」嘅朋友仔，話俾佢哋知，有bonus係bonus嚟架咋，員工要有良心喲。